عنوان: کمیٹی کا زیادہ سے زیادہ مہر مقرر کرنے اور شادی کے موقع پر لڑکے و لڑکی والوں سے رقم لینے کا حکم

کیا فرماتےہیں علمائے کرام اس مسئلہ کے بارے میں کہ ہماری قوم  کے علمائے کرام مشران پر مشتمل ایک کمیٹی بنی ہے ۔قوم میں لڑکیوں کے حقِ مہرکو ایک معین طور پر مقررکیا کہ قوم کی ہرلڑکی کا حقِ مہرپانچ لاکھ روپے ہوگا،اس سے ایک روپیہ بھی زیادہ نہیں ہوگا۔

کمیٹی کا یہ کہنا ہے کہ اس سے زیادہ حق مہراداکرناقوم کی اکثریت کی  طاقت میں  نہیں ہوتا، جس کی وجہ سے لڑکےاور لڑکیوں کے نکاح کا عمل مشکل ہوجاتاہے،اورلڑکے لڑکیوں کے فتنہ میں پڑنے کا اندیشہ ہے ۔لہٰذا فتنہ سے بچنے کےلیے پوری قوم پر یہ فیصلہ ماننا لازمی ہے ،اس فیصلہ کے خلاف ورزی کرنے والوں پر قوم  نے سزابھی مقررکی ہے ۔نیز پانچ لاکھ سے زیادہ لی ہوئی رقم بھی اس سے واپس لی جاتی ہے ۔مزید کچھ مالی جرمانہ بھی مقررہے ،جوکہ کمیٹی کی صواب دید پر منحصر ہے ۔

نیز شادی کے موقع پر کمیٹی کے ممبران لڑکی والوں  سے دس ہزارروپے لیتے ہیں اورلڑکے والوں سے بیس ہزارلیتےہیں ۔کمیٹی ممبران یہ رقم اس فیصلے پر عمل درآمد کی نگرانی کی وجہ  اجرت کے طور پر وصول کرتے ہیں۔

اب شرعایہ معلو م کرناہے:کہ کمیٹی کی جانب سے قومی سطح پر متعین مہر   مقررکرنا درست ہے یا نہیں ؟نیز کمیٹی کا لڑکی لڑکے کے والدین سے  اجرت کے طور پر دس اور بیس ہزار رقم لیناشرعا کیساہے ؟

شریعت مطہرہ نے   مہر کی کم سے کم مقدار(دس درہم)تو مقرر کی ہے،  لیکن اس سے زیادہ مقدار کی کوئی حد مقرر نہیں کی ہے؛ بلکہ اس کا مدار فریقین کی رضامندی پر موقوف رکھتے ہوئے اس بات کا پابند کیا ہے کہ لڑکی کے خاندان میں اس کی ہم عمر شادی شدہ خواتین کے رکھے گئے مہر سے کم نہ ہو،جسے فقہ کی اصطلاح میں مہر مثل سے تعبیر کیا جاتاہے،جس پر تمام فقہاء متفق ہیں،چنانچہ امیر المؤمنین حضرت عمر رضی اللہ عنہ نے جب اپنے دورِ خلافت میں زیادہ سے زیادہ مہر کی ایک مقدار (چار سو درہم) مقرر کرنے کا فیصلہ فرمایا، تو ایک عورت نے کھڑے ہو کر یہ اعتراض کیا کہ کیا آپ نے نہیں سنا کہ  اللہ تعالٰی نے مہر کے لئے قنطار(ڈھیر سارا مال) کا لفظ استعمال فرمایا ہے؟ چنانچہ یہ سن کر حضرت عمر رضی اللہ عنہ نے اپنی بات سے رجوع فرمایا، نیز چونکہ یہ تمام فقہاء کرام  کے درمیان متفق علیہ مسئلہ ہے، اس لئے اگر قاضی بھی مہر متعین کرنے کا فیصلہ کردے، تو اس کا فیصلہ بھی نافذ نہیں ہوتا، کیوں کہ فقہاء کا یہ اصول ہے کہ قاضی پر لازم ہے کہ وہ ہمیشہ راجح قول پر ہی فیصلہ کرے اور اگر مرجوح قول کو اختیار کرے گا، تو اس کا فیصلہ (صحیح قول کے مطابق) نافذ نہیں ہوگا،پس جب قاضی کے فیصلہ کے بارے میں شرعی حکم یہ ہے توکسی جماعت، برادری، پنجائیت، کو یہ اختیار کیسے ہوسکتاہے ،لہٰذا برادری کی سطح پر مہر مثل کا تعین تو کیا جاسکتاہے،تاہم زیادہ سے زیادہ مہر کے تعین کا اختیار عاقدین کے علاوہ کسی کو نہیں، البتہ مہر زیادہ مقرر کرنا کوئی اچھی بات نہیں، یہی وجہ ہے کہ حضرت عمر رضی اللہ عنہ لوگوں کو مہر کم کرنے کی ترغیب دیتے تھے اور انہیں رسول اللہ ﷺ کی پیروی کرنے کی تلقین فرماتے تھے۔

لہٰذ اصورتِ مسئولہ میں مذکورہ کمیٹی کو   زیادہ سے زیادہ مہرمقرر کرنے کا شرعا اختیارہی نہیں ،البتہ برادری کےلیے مہر مثل کا تعین باہمی مشورہ سے کیا جاسکتاہے، کمیٹی نے پانچ لاکھ روپے سے زائد مہر مقررکرنے پر جو پابندی عائد کی ہے ،اور مالی جرمانہ بھی مقرر کیا ہے ،ایسا کرنا بھی جائز نہیں ،نیز دولہااور دلہن کے والد سے جو نگرانی کے نام پر فیس لینے کا جو اعلان کیا ہے ،اس کا بھی انہیں شرعااستحقاق نہیں۔البتہ کمیٹی والے مہر کم کرنے کی ترغیب دے سکتے ہیں۔